未成年無照駕駛 最近5冬平均逐年有4.3萬件

發布時間：2024-10-18 19:15 更新時間：2024-10-18 22:18

根據交通部公路局的統計，最近五冬來，未成年無照駕駛的案件，平均一冬有4.3萬件左右。民間團體調查發現，遮的少年人無照駕駛的動機，除了偏鄉交通無方便以外，閣有一部份是感覺騎車、駛車誠鑠奅，建議愛參考國外的輔導措施，對青少年無照駕駛的動機切入去，才通解決問題。（新聞標題、導言及內文皆為臺語文）

15歲少年駛車出車禍，造成3个人死亡，引起各界關注未成年無駕照、無牌駛車的問題。根據公路總局統計，這五年未成年無照駕駛數量，逐年攏有4.3萬件左右。長期關心兒童交通安全的靖娟基金會認為，除了現行無照駕駛罰款、扣牌以外，建議加重處罰，而且參考日本等等外國修法，加入矯治、輔導措施。

靖娟基金會執行長 許雅荏：「有三成的部份來自怹ほ沿佮心理需求，感覺騎車誠奅。無照駕駛必須愛轉去監理站，去上課、教育，阮就引進親像社工、心理師。輔導的過程家長愛做伙來，首先先幫助怹對話，先理解（想欲）無照駕駛的原因到底是啥。」

沓沓仔共車駛振動，經過訓練、考著駕照才通安全上路。駕訓班教練講，親像歇熱是駕訓班大月，真濟拄滿18歲的學生囡仔會來學駛車，八月開始就會有較濟少年新手駕駛上路，拄駛車上捷因為緊張，就出車禍。

駕訓班教練 謝志宏：「方向燈是頭一个袂記的；第二个袂記看伊的ba-khú-mí-ah；第三，一旦緊張的時，油門、擋仔捎咧亂亂踏，亂亂踏的時陣，規台車就衝出去矣。」

駕訓班教練建議，先對熟似的路段開始駛，沓沓仔擴大駛車的範圍，熟似路草；也建議愛揣副駕駛陪同，安搭新手，避免緊張。針對外界質疑無照駕駛罰無夠重，交通部道安司講，會檢討現行法條；這馬也定期提供未成年無照駕駛名單予地方政府，由社會局、教育局介入關懷。